Signhild V. Johannesen virkandi borgarstjóri í Klaksvíkar kommunu

Av tí at Jógvan Skorheim, borgarstjóri, er burturstaddur uttanlands í privatum ørindum, hevur Signhild V. Johannesen, varaborgarstjóri, tikið við sum virkandi borgarstjóri.
Á nýggjárinum tók Signhild V. Johannesen við starvinum sum fyrsti varaborgarstjóri hjá Klaksvíkar kommunu, og hósmorgunin 12. januar 2017 settist hon fyri fyrstu ferð í stólin hjá borgarstjóranum.

Orsøkin til hetta er, at Jógvan Skorheim, borgarstjóri, verður staddur uttanlands í privatum ørindum í eina góða viku, og hevur Signhild tikið við ábyrgdini sum virkandi borgarstjóri hesar dagarnar.

Á kommunuvalinum í 2008 fekk Signhild 101 atkvøður á javnaðarlistanum, og varð hon fyrsti varalimur Javnaðarfloksins í valskeiðnum 2009-2012. Ein part av tí býráðssetuni sat hon í býráðnum sum avloysari fyri Eyðgunn Samuelsen, sum fór í Løgtingið.

Á kommunuvalinum í 2012 varð Signhild fyrstvald á javnaðalistanum við 182 atkvøðum, og gjørdist tá partur av býráðsmeirilutanum í júst loknu býráðssetuni frá 2013-2016, har hon eitt nú var forkvinna í mentanarnevndini umframt at hava sæti í fíggjarnevndini, sosialu nevnd, byggi- og býarskipanarnevndini og heilsu- og umhvørvisnevndini.

Á seinasta kommunuvali, sum var 8. november 2016, fekk Signhild 166 atkvøður og varð enn einaferð fyrstvald í býráðið fyri Javnaðarflokkin hetta valskeiðið 2017-2020, sum júst er byrjað. Signhild er partur av býráðsmeirilutanum millum Nýtt Sjálvstýri og Javnaðarflokkin, har hon, umframt starvið sum fyrsti varaborgarstjóri, verður forkvinna í mentanarnevndini og limur í fíggjarnevndini, limur í umhvørvis- og býarskipanarnevndini, varaforkvinna í trivnaðarnevndini børn & ung og varaforkvinna í trivnaðarnevndini eldri & bústaðir.

Signhild, sum er 49 ára gomul, er dóttir Johild og Vilhelm Johannesen, sum í nógv ár var virkin, bæði í lands- og kommunupolitikki. Í politiskum høpi er eisini vert at nevna, at Føroya løgmaður, Aksel V. Johannesen, er beiggi Signhild.

Signhild, sum dagliga starvast hjá Posta í Klaksvík, eigur børnini Johild, Jóhannus, Jógvan og Gunnvá.

Signhild gleðir seg til hesar dagarnar sum borgarstjóri.
– Tað verður spennandi og læruríkt, og eg fái møguleikan at uppliva tingini frá einum øðrum sjónarhorni, sigur Signhild og ynskir øllum eitt gott vikuskifti.

This website uses cookies. By continuing to use this site, you accept our use of cookies.