Home Tíðindir Betri samtakið gott úrslit

Betri samtakið gott úrslit

by OML

Samlaða úrslitið fyri samtakið var betri enn væntað í fyrra hálvári. Tó var tryggingarvirksemið merkt av endurgjaldi til ógvusligar skaðar. Úrslitið fyri samtakið var eitt avlop á 77,6 mió. kr. eftir skatt. Fyri skatt var avlopið 92,7 mió. kr.

Størsta skaðahendingin í søguni hjá Betri Trygging, ein eldsbruni í stórum virkisbygningi í Suðuroy, hevur, saman við tveimum øðrum stórum eldsbrunum, merkt úrslitið hjá Betri Trygging. Úrslitið var eitt lítið avlop á 0,4 mió. kr. móti einum avlopi á 14,4 mió. kr. fyrra hálvár 2016. Hetta verður ikki mett at vera eitt nøktandi úrslit.

Betri Banki hevði eitt betri úrslit enn væntað. Nettoúrslitið var eitt avlop á 87,8 mió. kr.  Høvuðsorsøkin til, at úrslitið er betri, eru hægri kursjavningar enn væntað, samstundis sum bankin hevur framt netto afturføringar av niðurskrivingum á lánum.

Nettorentuinntøkurnar vóru lægri enn sama tíðarskeið í fjør. Hetta orsakað av lága rentustøðinum á altjóða marknaðinum og av hørðu kappingini á føroyska peningastovnsmarknaðinum. Bæði útlán og innlán bankans eru vaksin í fyrra hálvári; útlánini við 242 mió. kr. og innlánini við 510 mió. kr.

Pensjóns- og lívstryggingarvirksemið hjá Betri samtakinum, Betri Pensjón, veksur støðugt, og avlopið á 1,8 mió. kr. eftir skatt verður mett nøktandi. Tryggingargjøldini íroknað innskot økjast og vóru góðar 73 mió. kr. fyrra hálvár 2017 í mun til smáar 59 mió. kr. fyrra hálvár 2016.

Útlitini fyri árið eru góð. Samtakið væntar eitt avlop á 120 -165 mió. kr. áðrenn skatt.

 

Hálvárið í stuttum:

  • Avlop eftir skatt var 77,6 mió. kr.
  • Avlop fyri skatt var 92,7 mió. kr.
  • Útlán hjá samtakinum vóru 5,5 mia. kr.
  • Innlán í samtakinum vóru 7,3 mia. kr.
  • Solvensur var 40,5%
  • Javni var 12,5 mia. kr.
  • Eginogn var 2,9 mia. kr.

 

Tak niður:

Hálvársroknskapur 2017 Betri P/F

You may also like

This website uses cookies. By continuing to use this site, you accept our use of cookies.