Eik Banki nøktandi úrslit hóast niðurskrivingar

Avlopið eftir skatt er 24 mió. kr., sum er lakari enn væntað, men nøktandi hóast tað. Fyri skatt er úrslitið 29 mió. kr.

Orsøkin til lakara úrslitið er í høvuðsheitum niðurskrivingar av einstøkum lánum, sum gjørdust neyðugar í fjórða ársfjórðingi 2015, eins væl og øktar útreiðslur til KT. Harafturat síggjast rentulækkingarnar aftur í tølunum.

“Okkara aðalmál er at vera fremsta val føroyinga og m.a. tí hava vit lækkað lægstu bústaðarlánsrentuna við tilsamans 10 prosentum í 2015. Sigast má, at tað eru serliga føroysku bústaðareigararnir, sum njóta gott av herdu kappingini á bústaðarmarknaðinum”, sigur Súni Schwartz Jacobsen, forstjóri í Eik.

Nettorentuinntøkur eru minkaðar nakað, og tað var væntandi orsakað av teimum rentulækkingum, sum Eik hevur framt serliga á bústaðarlánunum. Tó er minkingin í rentuinntøkunum úr 242 mió. kr. niður í 228 mió. kr. ikki so stór sum væntast kundi, hetta tí, at útlánini eru vaksin í sama tíðarskeiði. Stórur eftirspurningur er eftir lánum í Eik á privat- eins væl og á vinnuøkinum. Útlánini eru tískil vaksin úr 5,0 mia. kr. upp í 5,2 mia. Innlánini eru somuleiðis vaksin úr 6,0 mia. kr. upp í 6,6 mia. kr.

Fíggjarstøðan javnvigaði við 8,1 mia. kr., sum er ein vøkstur uppá 534 mió. kr. Vøksturin kann í stóran mun førast aftur á vøksturin í ávikavist inn- og útlánum bankans.

Við árslok 2015 var solvensurin 21,6 prosent móti einum individuellum solvenstørvi á 11,3 prosent. Lógarkravdi solvensurin er 8 prosent.

Við árslok hevði Eik Banki ein yvirdekning uppá 176,5 prosent í mun til lógarkravda gjaldførið, og eginognin var knappar 1,3 mia. kr.

Bankin er væl fyri, og útlitini fyri komandi árið eru góð. Bankin væntar eitt avlop eftir skatt uppá 70-110 mió. kr. fyri árið 2016.

Árið 2015 í stuttum:

  • Avlop eftir skatt er 24 mió. kr.
  • Avlop fyri skatt er 29 mió. kr.
  • Útlán bankans eru økt til 5,2 mia. kr.
  • Innlán bankans eru økt til 6,6 mia. kr.
  • Nettorentuinntøkur eru 228 mió. kr.
  • Gjaldførið 176,5 prosent yvir lógarkravið
  • Solvensurin er 21,6 prosent

 

Tak niður

Tíðindaskriv

Ársfrásøgn 2015

kelda:eik.fo